CONTOH PAMBIWARA DALAM ACARA PAHARGYAN PANINGSET
Katur para sutresna budaya lan kabudayan djawi ingkang pantes kinurmatan, kangge hanguri-uri kabudayan tilaranipun para luhur linangkung hing Keraton Surakarta Hadiningrat, keparengna kula suka hangaturaken " TUTUNAN PAMBIWARA HAMICARA " . Hing pangajab mugi saged handadosaken panuntun dhumateng para bebrayan agung, manawi pikantuk ayahan utawi jejibahan minangka pambiwara.
Ingkang punika kula mboten ateges sampun mumpuni babagan basa sastra, sarta sampun pana ing reh budaya lan kabudayan djawi, hinggih namung adapur nuruti obahing gesang ( urip ) Kula.Kanthi punika sumangga katur para sutresna budaya anggenipun kepareng badhe suka andaran saha tambahan murih sampurnaning tuladha punika.
Wasana pungkasaning atur, kula hanglenggana inggih hawit cubluk lan andaping pawiyatan kula, kirang pana ing babagan basa lan sastra, langkung -langkung cupeting pangertosan kula bab punapa kemawon kula tansah tumadah hanampi kanthi iklasing manah sadaya panyaruwe lan panacat panjenengan, kula ngaturaken panuwun sarta nyuwun pangapunten, mugi -mugi tuladha punika wonten ginanipun tumrap ingkang badhe ngersakaken Wassalamu'alaikum Wr.Wb.
Kartasura , 4 Juni 202
Atur kula
Hartoko Hadinagoro
TULODHO PAMBIWARA PAHARGYAN PANINGSET
PAMBIWARA MAOS URUT LAMPAH.
Assalamu'alaikum wr.wb
Kula nuwun Para sesepuh pinisepuh ingkang winantu sagung pakormatan .
Para tamu sinedhahan kakung putri ingkang winantu suka rahayu, nenggih guguping manah kula ing wanci................. ( siang / ratri ) punika, hawit rinesaya dening Bapa.................. sekaliyan ingkang saperlu kadhawuhan mbiwarakaken hanggenipun kapareng hanetebi jejering sepuh, badhe hanampi pasrah panampi Gana Paningset, hawit putri siwinipun ingkang hanama Rr ................... ingkang badhe sinengsetan Bg....................putra kakungipun Bapa............... Ingkang apidalem ing.... ................lemebet wewengkon.. ........... ......
Selajengipun pambiwara badhe hamaosaken rancangan urut lampah ringkes ingkang sampun karakit dening para sutresna budhaya wonten ing ................................Para tamu sinedhahan, minangka purwakaning atur, sumangga nun langkung rumiyin panjengan sedaya lan kula, kula dherekaken hangunjukaken panuwun gung dhumateng Gusti ingkang Maha mirah, Tresna Welas lan Asih, bilih hing wanci............... ( Dali / siang ) punika panjenengan sadaya lan kula pinarengaken manunggil wonten hing wisma pahargyan lamaran kanthi wilujeng nirhing sambekala.
Dene Nugraha ingkang sampun katumedhakaken punika, sumangga dipun tampi kanthi suka mardikaning panggalih, satemah badhe hanentremaken swasana lahir tumusing batos.
Para tamu sinedhahan kakung putri, ingkang winahyo suka basuki tatacara ingkang kapisan rawuhipun calon panganten kakung sapendherek, saksampunipun utusan sapendherek sampun kepareng lenggah kanthi prayugi, tumuli badhe katindhakaken tatacara pasrah panampi Gana Paningset
Sakparipurnaning tatacara Pasrah Paranampi Paningset tumuli badhe katindhakaken tatacara liru kalpika seser paningset, Hinggih kanthi rampunging tatacara liru kalpika paningset badhe katindhakaken tatacara manembrama pambagya raharja, wondene ingkang pungkasan paripurnaning pahargyan paningset kanthi katindhakaken tatacara pamitan saha tanggap pamit.
Para tamu sinedhahan kakung putri, makaten menggah urut lampah ringkes tatacara pahargyan pasrah panampi paningset hing wanci punika, salajengipun mugi hing purwa, madya dumugining wusana, Gusti ingkang maha Agung tansah paring panganyoman, hayu rahayu ingkang tansah pinanggih.
Nuwun.
PASRAH PANAMPI PANINGSET KAWIWITAN
Para tamu sinedhahan, hawit calon penganten kakung sakpendherek hing wanci ( siang / dalu) punika sampun kapareng lenggah kanthi prayogi, salajengipun tumuli badhe kawiwitan tatacara Pasrah Panampi Gana Paningset, ingkang punika katur Bp............... ( ingkang pasrah ) saha Bp...... .........( ingkang hanampi ) Susana pandaya wara kasumanggakaken, nuwun.
TANGGAP PANAMPI
Para tamu sinedhahan, tatacara pasrah sampun paripurno niskala sambikala, salajengipun badhe katampi Bp.........................dene jumenengipun badhe kasumbul mungguhing wuri dening Bp.............. ( ingkang hamengku gati )sakaliyan. Manawi samudayanipun sampun samekta ,wekdal kasumanggakaken Nuwun.
SIMBOLIS PASRAH PANAMPI SEDHAH AYU PISANG AYU
Para tamu sinedhahan, tatacara pasrah panampi sampun rampung, ingkang salajengipun minangka simbolis badhe katindakaken tatacara srah panampi sedhah ayu pisang ayu, ingkang punika katur Bp............. ( ingkang pasrah ) mugi kapareng hamasrahaken sedhah ayu pisang ayu katur Bp............ ( ingkang hanampi ) ,manawi sampun tinampi, tumuli kalajengaken ka aturaken dhateng Bp............ ( ingkang hamengku gati ) sakaliyan. Manawi sampun sanekta ing gati, wekdal kasumanggakaken ,Nuwun
Para tamu sinedhahan kakung putri, tatacara pasrah panampi sedhah ayu pisang ayu sampun paripurna niskala sambikala, ingkang salajengipun badhe katindhakaken tatacara liru kalpika seser paningset. Ingkang punika katur Ibu........ .saha Ibu............. mugi kapareng sigra hanganthi calon panganten putri tumuju dhateng Susana liru kalpika seser paningset, dene ingkang kasuwun mratitisaken Ibu...................., manawi sampun samudayanipun sampun satata, rahayuning sedya kasumanggakaken, nuwun.
ATUR PAMBAGE RAHARJA
Para tamu sinedhahan ingkang satuhu pantes tampi beja lan mulya, tatacara liru kalpika seser paningset sampun paripurna niskala sambekala, ingkang salajengipun Bp............... ( ingkang hamengku gati ) badhe hangaturaken pambage wilujeng, hinggih awit hanampi karawuhan panjenengan sadaya handamel mongkoking manager, pramila sanajan ta namung saklimah datanpa saget atur pangandikan, salajengipun badhe dipun wakili Bp................... dene jumenengipun badhe kasumbul Bp............ ( ingkang hamengku hating) sakaliyan, manawi samudayanipun sampun satata, Susana pandaya wara kasumanggakaken, nuwun.
PAMIT SAHA TANGGAP PAMIT
Para tamu sinedhahan kakung putri, tatacara pahargyan Pasrah Panampi Gana Paningset hing wanci ( siang / dalu ) punika sampun paripurna, ingkang punika kangge hanjangkepi tatacara hing wanci punika badhe katindhakaken tatacara pamitan, ingkang punika katur Bp..........( utusan) sasana pandaya wara kasumanggakaken, nuwun.
TANGGAP PAMIT
Para tamu kakung putri ingkang winengku suka bagya, tanggap wara pamit sampun rampung ingkang punika tumuli badhe katindhakaken tanggap pamit, salajengipun katur Bp.......... ( wakil saking ingkang hamengku hating) sasana pandaya wara kasumanggakaken, nuwun.
PAHARGYAN PURNA
Para tamu sinedhahan kakung putri, tatacara pamit saha tanggap pamit sampun purna kalis hing rubeda, ingkang salajengipun katur Bp........... ( ingkang hamengku gati ) sakaliyan kaparenga jumeneng wonten sangajenging Susana pahargyan, ingkang saperlu tangkep asta saha hanguntapaken kunduripun para tamu.
PAMBIWARA HAMUNGKASI KARYA
Para tamu sinedhahan, kula ingkang rinesaya minangka jejer pambiwara, wiwit hing purwa madya dumugining wusana tartamtu pinanggih kathah kalepatan kula, ingkang punika kula namung saged hangaturaken nyuwun lumunturing samodra pangaksami. Wusana Wassalamu'alaikum Wr. Wb.
Nuwun.
DAFTAR PUSTAKA
1. Kawruh Pambiwara Anggitanipun KRT. Bowodipoero Dwijo Sanggar Pasinaon Pambiwara Keraton Surakarta
2. Buku Tuntunan Pambiwara Anggitan RT. Gunopadmopuro Dwijo Sanggar Pasinaon Pambiwara Keraton Surakarta Hadiningrat
3.Upacara Mantu Jangkep Gagrag Surakarta Anggitan Suyadi Respatiyono Staf KST Karanganyar
4. Buku Tuntunan Hamicara Anggitan KRA. Winarna Kusuma Dwija Sanggar Pasinaon Pambiwara Keraton Surakarta Hadiningrat
5.Sesorah Pranatacara saha pamedar sabda, anggitan Sri Hono Murwatono
6. Kamus istilah Perkawinan Adat Jawa Gaya Surakarta, Maryana Dwiharja - W. Hendrasaputra - Suparja Imam Sutarja - Sumarlan - Y. Suwanta - Siti Muslifah
7. Kawruh Pambiwara, Anggitan KRT. Soesena Renggadipura, Dwija Sanggar Pasinaon Pambiwara Karaton Surakarta
8. Penganten Gagrag Surakarta, Anggitan KRT. Soesena Renggodipuro, Dwija Sanggar Pasinaon Pambiwara Karaton Surakarta
9. Siraman, Anggitan Suwarno Pringgowidagda
.png)
.png)
Komentar
Posting Komentar