LATIHAN PAMBIWARA ACARA LAMARAN BAGIAN 1

                                     

Belajar bahasa Jawa halus merupakan perjalanan yang penuh makna dan sarat nilai budaya. Sebagai pembawa acara, menguasai bahasa ini tidak hanya menambah kharisma, tetapi juga menunjukkan penghormatan terhadap tradisi dan adat istiadat Jawa yang kaya. Di blog "Budaya Djawa" ini mari kita mulai belajar tentang Pembawa Acara dalam bahasa jawa halus ( Pambiwara ). 

PURWAKA 

Assalami'alaikum wr.wb

Katur para sutresna budaya lan kabudayan djawi ingkang pantes kinurmatan, kangge hanguri-uri kabudayan tilaranipun para luhur linangkung hing Keraton Surakarta Hadiningrat, keparengna kula suka hangaturaken " TUTUNAN PAMBIWARA HAMICARA " . Hing pangajab mugi saged handadosaken panuntun dhumateng para bebrayan agung, manawi pikantuk ayahan utawi jejibahan minangka pambiwara. 

Ingkang punika kula mboten ateges sampun mumpuni babagan basa sastra, sarta sampun pana ing reh budaya lan kabudayan djawi, hinggih namung adapur nuruti obahing gesang  ( urip ) Kula.Kanthi punika sumangga katur para sutresna budaya anggenipun kepareng badhe suka andaran saha tambahan murih sampurnaning tuladha   punika. 

Wasana pungkasaning atur, kula hanglenggana inggih hawit cubkuk lan andaping pawiyatan kula, kirang pana ing babagan basa lan sastra, langkung -langkung cupeting pangertosan kula bab punapa kemawon kula tansah tumadah hanampi kanthi iklasing manah sadaya panyaruwe lan panacat panjenengan, kula ngaturaken panuwun sarta nyuwun pangapunten, mugi -mugi tuladha punika wonten ginanipun tumrap ingkang badhe ngersakaken 

Wassalamu'alaikum Wr.Wb.

Kartasura , 3 Mei 2024

             ATUR KULA

HARTAKA HADINAGARA

 

BAB.1

TULADHA PAMBIWARA

PAHARGYAN LAMARAN

( contoh Pambiwara dalam acara lamaran) 

A. PAMBIWARA MAOS URUT LAMPAH. 

( contoh Pambiwara membacakan susunan acara) 

Assalamu'alaikum wr.wb

Kula nuwun 

Para sesepuh pinisepuh ingkang winantu sagung pakormatan .

Para tamu sinedhahan kakung putri ingkang winantu suka rahayu, nenggih guguping manah kula ing wanci................. ( siang / ratri ) punika, hawit rinesaya dening Bapa.................. sekaliyan ingkang saperlu kadhawuhan mbiwarakaken hanggenipun kapareng hanetebi jejering sepuh, badhe hanampi palamar putri siwinipun ingkang hanama Rr ................... ingkang badhe kalamar Bg....................putra kakungipun Bapa............... Ingkang apidalem ing.... ................lemebet wewengkon.. ........... ...... 

Selajengipun pambiwara badhe hamaosaken rancangan urut lampah ringkes ingkang sampun karakit dening para sutresna budhaya wonten ing  ................................

Para tamu sinedhahan, minangka purwakaning atur, sumangga nun langkung rumiyin panjengan sedaya lan kula, kula dherekaken hangunjukaken panuwun gung dhumateng Gusti ingkang Maha mirah, Tresna Welas lan Asih, bilih hing wanci...............  ( Dali / siang  ) punika panjenengan sadaya lan kula pinarengaken manunggil wonten hing wisma pahargyan lamaran kanthi wilujeng nirhing sambekala. 

Dene Nugraha ingkang sampun katumedhakaken punika, sumangga dipun tampi kanthi suka mardikaning panggalih, satemah badhe hanentremaken swasana lahir tumusing batos. 

Para tamu sinedhahan kakung putri, ingkang winahyo suka basuki minangka purwakaning  tatacara rawuhipun utusan sapendherek, saksampunipun utusan sapendherek sampun kepareng lenggah kanthi prayugi, tumuli badhe katindhakaken tatacara palamar saha panampi. 

Sakparipurnaning tatacara palamar saha panampi badhe katindhakaken tatacara manembrama pambagya raharja, wondene ingkang pungkasan paripurnaning pahargyan lamaran hing wanci................ ......... ( siang  / dalu  ) punika. 

Para tamu sinedhahan kakung putri, makaten menggah urut lampah ringkes tatacara pahargyan lamaran hing wanci punika, salajengipun mugi hing purwa madya dumugining wusana, Gusti Ingkang Maha Agung mugi tansah paring panganyoman, hayu rahayu ingkang tansah pinanggih 

Nuwun